रंग पच्चीसी
रंग रूड़ौ रजथान .
सती जती अर सूरमा सोहै सुभट सुजान
मुधरी बोली मोवणी रंग रूड़ो रजथान
आडावल ऊभौ अडिग अड़ ऊंचो असमान
कोटि-कोटि कीरत कथन रंग रूड़ो रजथान
लाखीणी लूणी ललक जगत गंग जिमि जान
बहै बनास बड़भागिणी रंग रूड़ो रजथान
माही जाखम मानसी सिरैह चंबल शान
नवल नीर नित नरमदा रंग रूड़ो रजथान
भलौ भरीजै भाखड़ा बीसलपुर बलवान
सरवर तरवर सौवणा रंग रूड़ो रजथान
मकराणा रो मारबल राजसमद रसवान
जोधाणै छीतर जबर रंग रूड़ो रजथान
जैपुर जावो जगत में व्हालौ गढ़ बीकांण
पुसकर है परयाग सम रंग रूड़ो रजथान
जसनगरी जोधांण में मोटो गढ़ महरांण
चौक हथाई चाव री रंग रूड़ो रजथान
नाथ दुवारे नाथ जी दैव बड़ा दरसान
रुणिचा में रामदे रंग रूड़ो रजथान
उदियापुर अनमी अटल एकलिंग दीवान
झीलां नगरी झिलमिले रंग रूड़ो रजथान
सोहै खाटू श्याम जी सालासर हड़मान देशनोक करणी दरस रंग रूड़ो रजथान
दिलवाड़ै रा देवरा वैभव विपुल वितान
जैन धरम री जामणी
रंग रूड़ो रजथान
रणकपुरी रल़ियावणी जाणै सकल जहान
धिन अहिंसा परम धरम रंग रूड़ो रजथान
गढ़ चित्तौड़ी गजब रो पदमण री पहचान
जौहर साका जगमगै रंग रूड़ो रजथान
नारी भारी नेह रा निरमल दिया निसांण शीश काटकर समप्पिया रंग रूड़ो रजथान
खैर कैर अर खेजड़ा बोरां करूं बखान
पीलू ढालू पाँगरै रंग रूड़ो रजथान
चंग भपंग कमायचा ताल मंजीरा तान
मोरचंग मनभावणी रंग रूड़ो रजथान
सदा सवाया सौवणा करी ऊंट कैकांण
गाय दुवाड़ै गौरड़ी रंग रूड़ो रजथान
चिड़ी कमेडी आ चुगै धरमादा रो धान
मोर पपीहा मोकल़ा रंग रूड़ो रजथान
पैरण धोती पागड़ी अंगरखी अचकान
मोत्यां मूंघी मोजड़ी रंग रूड़ो रजथान
महल अटारी माल़िया छायां छप्पर छान
पड़वा पाल़ी प्रीतड़ी रंग रूड़ो रजथान
भाटै भाटै भोमिया थळवट्ट थपिया थान
जग चावा झूंझार जी रंग रूड़ौ रजथान
तेज धार तलवार है मखमल रो है म्यान
भाला ढालां भळकतौ रंग रूड़ौ रजथान
आखै भारत आखतां नर निपजै निरवाण
ठावी अर चावी ठसक रंग रूड़ौ रजथान
आयां रो आदर अठै अपणायत अहनांण
इधको है इल़ ऊपरां रंग रूड़ो रजथान
🙏🏻🙏🏻🙏🏻🙏🏻🙏🏻
@©© रतन सिंह चाँपावत रणसी गांव कृत
कोई टिप्पणी नहीं:
एक टिप्पणी भेजें